Makalah Kawih Jeung Kakawihan

MAKALAH

KAWIH JEUNG KAKAWIHAN

Diajengkeun pikeun nyumponan tugas kelompok mata kuliah Menyimak Intensif

Ditulis Ku:

             1.      Atik Cahyatiningsih

             2.      Hadi Prasetyo

             3.      Nopitasari

PROGRAM PENDIDIKAN BAHASA SUNDA

STKIP MUHAMMADIYAH KUNINGAN

2010/2011

PANGJAJAP

          Puji sinareng sukur ku kuring saparakancaka sumanggakeun mung ka Gusti Nu Maha Suci sabab mungguhing Ridho ti Anjeunna sim kuring saparakanca tiasa ngarengsekeun salasahiji pancen mata kuliah Menyimak Intensif ti kersana dosen Nanin Nurnaningsih, S.Pd nyaeta pedaran ngeunaan Kawih jeung Kakawihan.

            Kiwari barudak urang Sunda, pangpangna nu aya di kota mah sigana geus langka arulin bari kakawihan teh. Supaya ulah laleungiteun jeung supaya barudak waranoh, di dieu rek diberendelkeun ngeunaan Kawih jeung Kakawihan.

            Anapon kitu, pasti ari kakurangan mah aya bae, sim kuring saparakanca neda sih hapunten. Pamugi pedaran ieu aya mangpaatna hususna pikeun sim kuring saparakanca, oge pikeun pamaca sejenna.

                                                                                    Kuningan, April 2011

                                                                                    Tim Panulis  

DAFTAR EUSI

PANGJAJAP   ............................................................................................             i

DAFTAR EUSI   ........................................................................................             ii

KAWIH JEUNG KAKAWIHAN   ...........................................................             1

1.      KAWIH   ........................................................................................             1

a.       Wangenan   ...............................................................................             1

b.      Conto Kawih   ...........................................................................             2

2.      KAKAWIHAN   ............................................................................             5

a.       Wangenan   ...............................................................................             5

b.      Kamekaran   ..............................................................................             5

c.       Ciri-ciri Kakawihan   .................................................................             5

d.      Klasifikasi Kakawihan   ............................................................             6

e.       Papasingan Kakawihan   ...........................................................             7

DAFTAR PABUKON   .............................................................................             19

KAWIH JEUNG KAKAWIHAN

1.      KAWIH

a.      Wangenan

            Nalika ngareungeu pangajaran ngeunaan kawih, tangtu ahirna kudu apal jeung bisa ngabedakeun antara kawih jeung kasenian sejenna. Saperti kakawihan, pupuh, jeung pupujian.

            Dina Kamus Umum Basa Sunda (KUBS, 1995) wangenan kawih nyaeta rakitan basa sabangsa dangding nu teu make patokan pupuh. Kawih teh lalaguan Sunda bebas, anu henteu kauger atawa kaiket ku aturan, boh laguna, boh rumpakana. Lalaguan pop Sunda karangan Nano S, Doel Sumbang, atawa nu sok dihaleuangkeun ku seniman calung Hendarso, eta teh lagu kawih.

            Kawih jeung kakawihan ngabogaan sasaruaan nyaeta sarua rakitan sabangsa dangding anu henteu ngagunakeun patokan pupuh, sedengkeun bedana nyaeta tina fungsina, mun kawih mah saukur didangdingkeun atawa dilagukeun sedengkeun kakawihan mah ngabogaan fungsi tambahan nyaeta dipake dina kaulinan barudak.

            RMA. Koesoemadinata (dina Soepandi, 1985 : 14) mere katerangan ngeunaan kawih nyaeta sekar (tembang=kawih), ieu aya dua rupa :

1.      Sekar irama merdeka, nyaeta tembang nu panjang pondokna sora jeung wirahmana sakarep-karep numutkeun raosna priyangga, numutkeun kangeunahan nu tembang kayaning : tembang buhun rancag, tembang buhun raehan, beluk,  kakawen, suluk, tembang Cianjuran, tembang Ciawian, kakawihan dongeng.

2.      Sekar tandak, nyaeta tembang anu ajeg wiletanana, tegesna lolongkrang-lolongkrang antara wirahma-wirahma sarua sakabehna.

            Kadieukeunna kawih jeung tembang dibedakeun. Ari kawih mah dihartikeun sekar tandak, sedengkeun tembang nyaeta sekar irama merdika atawa lagu swara.

b.      Conto Kawih

      BUBUY BULAN

      (Cipt. Beni Corda)

Bubuy bulan, bubuy bulan sangray bentang

Panon poe, panon poe disasate

Unggal bulan, unggal bulan abdi teang

Unggal poe, unggal poe oge hade

Reff.

Situ Ciburuy laukna hese dipancing

Nyeredet hate ningali ngeplak caina

Tuh itu saha nu ngalangkung unggal enjing

Nyeredet hate ningali sorot socana

      TANAH SUNDA

Tanah Sunda, gemah ripah

Nu ngumbara suka betah

Urang Sunda sawawa sing toweksa

Percaka nyangga darma anu nyata

Seuweu Pajajaran muga tong kasmaran

Sing tulaten jeung rumaksa

Miara pakaya memang sawajibna

Geten titen rumawat tanah pusaka

      POTRET MANEHNA

      ( Cipt. Nano S )

Potret manehna

Nu katampa minggu kamari

Di piguraan

Di simpen dihade-hade

Anteng diteuteup

Jadi batur dina simpe

Aduh endahna

Mapaesan taman hate

Potret manehna, potret manehna

Ditilik, disidik-sidik

Diteuteup, di bolak-balik

Ku manis bae

Potret manehna, potret manehna

Socana, imitna, teuteupna, sagalana

Ngan keur kuring bae

Potret manehna

Wawakil jirim jinisna

Tanda satia

Ngarah kangen salilana

Matri hiji dina ati

Gambar diri jadi bukti

Najan anggang rang patepung

Potret nu digugulung

Potret manehna

      MOJANG PRIANGAN

      ( Cipt. Iyar Wiarsih )

Angkat ngagandeuang

Bangun taya karingrang

Nganggo sinjang dilamban

Mojang Priangan

Umat-imut lucu

Sura-seuri Nyai

Larak-lirik kepat

Mojang Priangan

Reff.          Diraksukan kabaya

                  Nambihan cahayana

                  Dangdosan sederhana

                  Mojang Priangan

Mojang anu donto

Matak sono nu nempo

Mun tepung sono ka

Mojang Priangan

Gareulis maranis

Disinjang lalenjang

Estu suluk mun leumpang

Mojang Priangan

Ti gigirna lenggik

Ti hareupna ge sieup

Ti tukangna lenjang

Mojang Priangan

2.      KAKAWIHAN

a.      Wangenan

                        Kakawihan asal kecapna tina kawih, nu hartina rakitan basa sabangsa          dangding nu teu make patokan pupuh. Ngawih nyaeta ngalagukeun kawih     atawa sisindiran. Ieu kabangkitan teh ka asup sastra buhun, gelarna dina sastra       Sunda mangrupa sastra sampakan. Tapi nu boga kakawihan teh lain ngan ukur             urang Sunda wae, unggal seler bangsa oge miboga kakawihan sewang-       sewangan. Kawih kaasup sastra lisan, simebarna tatalepa sacara turun-  tumurun di lingkungan masarakat. Ku kituna kakawihan sering disebut sastra balarea. Kakawihan lain ngan saukur dipake bari ulin, tapi oge sok dipake bari        digawe.

            Kiwari kakawihan dihartikeun lagu-lagu nu sok dinyanyikeun ku barudak bari ulin, nepi ka sakapeung sok disebut kakawihan barudak atawa kaulinan barudak. Wibisana spk (2000:387) nyebutkeun lagu rahayat, hartina lagu jeung lirikna geus baku, sifatna anonim, jeung nyebar ti jaman baheula.

b.      Kamekaran

            Kakawihan (teks, fungsi, jeung basa) robah luyu jeung kahirupan masarakat. Nurutkeun kalungguhanna, kakawihan bisa dipasing-pasing jadi dua golongan nyaeta kakawihan pikeun kaulinan jeung kakawihan pikeun gawe.

c.       Ciri-ciri Kakawihan

            Kakawihan mangrupa tina folklore, ku kituna tina ciri-ciri folklore dipimilik oge ku kakawihan, diantarana :

1.      Sumebar jeung diwariskeun sacara lisan.

2.      Sifatna tradisional, nyebarna angger diantara kelompok anu tangtu.

3.      Aya varian jeung versi, kajadian poho jeung interpolasi sok nimbulkeun bedana teks. Ku kituna sakapeung teksna sok beda wirahmana sarua, atawa wirahmana sarua teksna nu beda.

4.      Umumna anonym.

5.      Miboga rumus jeung pola.

6.      Polos jeung lugu, sakapeung jiga kasar jeung spontan (Danajaya, 1984).

d.      Klasifikasi Kakawihan

            Kakawihan bisa diklasifikasikeun dumasar fungsina, basana, waktu ngawihkeunna, oge uesina.

            Dumasar fungsina, kakawihan pikeun kaulinan, pikeun sumanget digawe, pikeun mepende, oge pikeun protes sosial.

1.      Kakawihan pikeun kaulinan.

Kakawihan nu dipake dina ngamimitian kaulinan diantarana : Cing ciripit, Dal del dol, jeung Hompimpah. Kakawihan sapanjang kaulinan : Aanyaman, Ambil-ambilan, Ayang-ayang Gung, Babagongan, Cingcangkeling, Eundeuk-eundeukan, jeung sajabana.

2.      Kakawihan pikeun numuwuhkeun sumanget digawe diantarana : Mars Siliwangi, Ngawuluku, jeung Ngagebahan Manuk.

3.      Kakawihan pikeun mepende, diantarana : Nelengnengkung, Pat Lapat, jeung sajabana.

4.      Kkawihan pikeun protes sosial, mangrupa gambaran protes kana hiji kaayaan dina mangsa eta kakawihan dijieun, misalna : Ayang-ayang Gung, Bolu Bugem, Dengkleung Dengdek, Prangpring, Tong tolang Nangka, Hatiku jang Wawan, jeung Eundeuk-eundeukan Lagoni.

            Dumasar basana, aya nu eusina sagemblengna ngagunakeun basa Sunda jeung aya anu campur jeung basa sejen. Misalna : Punten Mangga, Pupujian, Sri Jendil Adil, Slep Dur, jeung Ula Ulo Kembang.

            Dumasar waktu, aya nu tadina sok dikawihkeun beurang atawa peuting, oge aya anu beurang jeung peuting. Contona : Kalonhking jeung Bulan Tok.

            Dumasar wangun, teksna aya anu dialog jeung aya anu monolog.

1.      Kakawihan wangun dialog, diantarana : Ambil-ambilan, Baju Beureum, Bolu Bugem, Cir Kupek, Gobang Kalima Gobang, Tong Tolang Nangka, Eundeuk-eundeukan Lagoni, jeung Wek-wek Dor.

2.      Kakawihan wangun monolog, diantarana : Aanyaman, Ayang-ayang Gung, Babagongan, Cingcangkeling, Cing Ciripit, Gobang Gocir, jeung sajabana.

            Dumasar eusi, kakawihan loba nu ngagambarkeun kaayaan masarakat Sunda dina jamanna, mangsa kakawihan diciptakeun (Wibisana spk (2000: 387-396). Contona : Jung Jae, Ayang-ayang Gung, jeung sajabana.

e.       Papasingan Kakawihan

      Nilik kana wangunna,kakawihan barudak teh bisa dipasing-pasing jadi sababaraha golongan, diantarana:

1.      Wangun Paparikan

            Kakawihan wangun paparikan nyaeta anu ngawangunna saperti paparikan; aya cangkang aya eusi. Bedana, unggal padalisanhenteu matok dalapan engang, anu penting asal sasora. Kitu deui jumlah padalisanana dina sapadana. Katembong dina sawatara kakawihan di handap.

            HOMPIMPAH

Hompimpah alaikum gambreng,

Ma Ijah make baju rombeng.

            PEREPET JENGKOL

Perepet jengkol jajahean,

Kadempet…jejeritan.

            TOKECANG

Tokecang tokecang,

Balagendir tosblong.

Angeun kacang angeun kacang,

Sapendil kosong.

            TAT TIT TUT

Tat tit tut daun kaliki,

saha nu hitut budak lalaki.

Tat tit tut daun kanyere,

saha nu hitut budak awewe.

            CINGKOROKOK

Cingkorokok bedegol cau,

Ucingna nokok boolna bau.

            TAMPOLONG BAHE

Tampolong bahe,

belut ditalian.

Tong ngomong bae,

gelut sakalian.

2.      Kakawihan Laraswekas

            Kakawihan laraswekas nyaeta kakawihannu murwakanti engang tungtung, boh dina kecap-kecap dina saungkara boh dina kecap-kecap antarpadalisan. Contona:

            OLE-OLE OGONG

Ole-ole ogong

melak cabe di Tarogong

dihakan ku embe ompong

diteang kari sapotong

            KALONGKING

Kalongking kalongking

bapa sia Utah ngising

dibura ku madu kucing

madu kucing meunang maling

Kalongking kalongking

bapa sia Utah ngising

beak samak beak samping

teu cageur waktu sapeuting

            HATIKU JANG WAWAN

Hatiku Jang Wawan

tumpak mobil sedan

sedanna ucutan

di kolong jembatan

omean

teu boga duit

ngajual domba

dombana leungit

ngajual mitoha

            TRANG-TRANG KOLENTRANG

Trang-trang kolentrang

si londok paeh nundutan

mesat gobang kabuyutan

tikusruk kana durukan

nyeh prot, nyeh prot

            EUNDEUK-EUNDEUKAN

Eundeuk-eundeukan lagoni

Meunang peucang sahiji

Leupas deui ku nini

Beunang deui ku aki

            UCANG-UCANG ANGGE

Ucang-ucang angge

Mulung muncang di papangge

Digogog ku anjing gede

Anjing gede nu Mang Lebe

Ari gog, gog cingungung

3.      Kakawihan Margaluyu

            Kakawihan margaluyu nyaeta kakawihan anu kecap atawa engang dina tungtung padalisan, dibalikan deui dina awal padalisan, dibalikan deui dina awal padalisan sapandeurieunana. Contona:

           

AYANG-AYANG GUNG

Ayang-ayang gung

Gung goongna rame

Menak Ki Mas Tanu

Nu jadi wadana

Naha maneh kitu

Tukang olo-olo

Loba anu giruk

Ruket jeung Kumpeni

Niat jadi pangkat

Katon kagorengan

Ngantos Kanjeng Dalem

Lempa-lempi lempong

Ngadu pipi jeung nu ompong

Jalan ka Batawi ngemplong

            BANG KALIMA-LIMA GOBANG

Bang kalmia-lima gobang, bang

Bangkong di tengah sawah, wah

Wahay tukang bajigur, gur

Guru sakola desa, sa

Saban poe ngajar, jar

Jarum paranti ngaput, put

Putrid nu gareulis, lis

Lisung kadua halu, lu

Luhur kapal udara, ra

Ragrag di Jakarta, ta

Taun opat hiji, ji

Haji rek ka Mekah, kah

Kahar tujuh rebu, bu

Buah meunang ngala, la

Lauk meunang nyobek, bek

Beker meunang muter, ter

Terus ka Citapen, pen

Pena gagang kalam, lam

Lampu reujeung dammar, mar

Mari kueh hoho, ho

Hotel pamandangan, ngan

Ngantos Kanjeng Dalem, lem

Lempa-lempi lempong

Ngadu pipi jeung nu ompong

            BEAS BEUREUM

Beas beureum, reum

Reumbeuy kacang, cang

Cang kadele, le

Letah sapi, pi

Pindang lubang, bang

Bangkong hejo, jo

Joli jopak joli ong

4.      Kakawihan Mondoan Kawit

            Kakawihan mondoan kawit nyaeta kakawihan anu malikan (mindo) kecap anu sarua dina awal padalisan. Contona:

            PUNTEN MANGGA

Punten…, mangga

Ari ga, Gatotgaca

Ari ca, cau ambon

Ari bon, bonteng asak

Ari sak, sakit perut

Ari rut, rujak asem

Ari sem, sempal-sempil

Ari pil, pilem rame

Ari me, maja makan

Ari kan, kantong kosong

Ari song, songsong lampu

Ari pu, puak-paok

Ari wok, wok candewok

            TIK-TIK TOLEKTAK

Tik-tik tolektak

Ari tak, taktak bareuh

Ari reuh, reuhak cina

Ari na, Nya Genggong

Ari gong, gongseng panas

Ari nas, nasi baso

Ari so, sorangan bae yeuh…

Conto Kakawihan Sejenna

            CINGCANGKELING

Cingcangkeling

Manuk cingkleng cineten

Plos ka kolong

Bapa Satar buleneng

            Cingcangkeling the nyaeta kawih paranti milang samemeh barudak ulin ucing-ucingan. Samemeh prung sok dikawihan heula ku saurang.

            PRANG PRING

Prang pring, prang pring

Salumprang salampring

Sabulu-bulu gading

Si gading ka Sunda perang

Pur kuntul engkang-engkang

Munding ngabongkar kandang

Saluwek sadugel cindel

Heug, heug caringin runtuh

Heug, heug caringin runtuh

Dorokdok gubrag

            Prang pring nyaeta kawih kaulinan dipakena ku barudak bari dariuk ngajajar, atawa ngariung bari nyanghunyar. Bari ngawih bincurang ditepakeun. Dina madakeun budak nu ka tepak panungtung kudu mintelkeun sukuna jadi emok.

            RORO MANYORO

Roro manyoro

Manyoro manjangan ngidul

Anak sia jadi ratu

Diketukan dikenongan

Turunan apung

Karunya ka anak sia

            CACA BURANGE

Caca burange, burange

Tali gobang

Gobang pancarange

Anak gajah berbayung

Jing gojing lewe-lewe

Jing gojing lewe-lewe

            JUNG JAE

Jung jae balakatanjung jae

Pucuk menyan mangsoyi

Godong malati, riri

Riri nyandung ka putra

Dalem Tumenggung Bandung

Bandung tipung palongpong

Saunda-unda poho

Poho tadi lalajo

Teu mawa simbut, butut

            ORAY-ORAYAN

Oray-orayan

Luar-leor mapay sawah

Entong ka sawah parena keur sedeng beukah

Oray-orayan

Luar-leor mapay leuwi

Entong ka leuwi

Di leuwi loba nu mandi

Oray-orayan

Oray naon

Oray bungka

Bungka naon

Bungka laut

Laut naon

Laut dipa

Dipa naon

Di pandeuri, ri…ri…ri…

            Barudak nu rek ulin oray-orayan samemehna silih cekel taktak heula. Nu tukang nyekel taktak nu hareupeunana, jeung saterusna. Geus kitu tuluy maju ka kenca ka katuhu, nepi ka katempona ngaleor siga oray.

            CING CIRIPIT

Cing ciripit

tulang bajing kacapit

kacapit ku bulu pare

bulu pare seuseukeutna

jol Pa Dalang

mawa wayang, jrek-jrek nong….

            Cing ciripit teh nyaeta kawih paranti milang samemeh ucing-ucingan.

            AMBIL-AMBILAN

+         :           Ambil-ambilan

                        Turuktuk hayam samantu

_          :           Euweuh nu diambil

                        Di dieu kokoro kabeh

+         :           Pun anu-anu (ngaran nu dimaksud) bae

                        Purah nutu purah ngejo

                        Purah ngasakan baligo

                        Purah tunggu bale gede

_          :           Nyerieun sukuna

                        Kacugak ku kaliage

+         :           Aya ubarna

                        Urat munding sampurage

                        Tiguling nyocolan dage

            Laguna dikawihkeun ku dua rombongan, ngajajar pahareup-hareup. Ngawihna siligenti patembalan. Budak nu kapilih ku rombongan nu kabagian milih, disebut ngaranna, tuluy ppindah ka rombonganana. Pindahna bari engke-engkean, sarta disurakan: “maling endog” ku rombongan nu ditinggalkeun.

            PAT LAPAT

Pat lapat, pat lapat

Pat lapat katingalna

Masih keneh tebih pisan

Layarna bodas nyengcelak

Kasurung kaombak-ombak

            EULEUNG EUY EULEUNG

Euleung euy euleung

Barudak urang ka jami

Embung euy embung

Sieun badak nu kamari

Euweuh euy euweuh

Geus dibedil ku si Sedet

Detong, det detong

Si Sedet kari sapotong

            JALEULEU JA

Jaleuleu ja

Tulak tuja eman gong

Seurueh leuweung bay

Jambe kolot bug

Ucing katinggang songsong

Ngek!

            TUTUNJUKAN

Tutunjukan tetenjekan, Si Teteh anteur ka cai,

Ah, embung, sieun bugang dina muncang

Kokoplak saying kadanca,

Si paok katinggang picung, cungcurung ka Cipicung

Del odel papatong dosol

Tinyohnyor.

            Dikawihkeun bari nunjukan curuk nu diriungkeun. Biasana dilakukeun bari diuk ngariung.

            SASALIMPETAN

Sasalimpetan

Jajahan aing nu panjang hey! hey!

Sasa nu panjang

            Kawih dipakena bari ulin pacekel-cekel leungeun, tapi lobaan, ngajajar ka gigir. Nu tungtung kenca muntang kana tihang atawa tangkal. Bari ngarawih nu tungtung katuhu leumpang ka Beulah kenca dituturkeun ku nu sejenna, nepi ka ahirna kabeh budak leungeunna marilit.

            TONG TONG PAPATONG

Tong tong papatong

Dibere cau sapotong

Ari beak menta deui

Teup, teup, teup

Ari eunteup jang si Ujang.

            Dikawihkeun ku barudak lamun rek ngala papatong.

DAFTAR PABUKON

Drs. Budi Rahayu Tamsyah, Spk, PANGAJARAN SASTRA SUNDA Pikeun SD, SLTP, SMU, jueung Umum, Pustaka Setia.

Rachmat Taufiq Hidayat, Drs. Dingding Haerudin,M.Pd, Drs. Teddt A.N. Muhtadin, Darpan, S.Pd, Ali Sastramidjaja, PEPERINIAN URANG SUNDA, Kiblat.

http://astriecollection.blogspot.com/2010/10/kawih.htm

http://astriecollection.blogspot.com/feeds/posts/default?orderby=updated